استمر اللقاء أكثر من ساعة ونصف

ومفيش تصريح ممكن نطلع بيه

أولياء الأمور في وادي . والوزارة في وادي ثالث خالص

بس أحسن جملة سمعتها من الضيفة :: أنا امتحنت هناء خلاص .. أمتحنها تاني ليه

دي بتوضح حاجتين

الحاجة الأولى : إن ولي الأمر بيعيش المنهج مع ابنه وبيتحرق دمه زي الطالب بالظبط .. إن لم يكن أكثر

الحاجة التانية : ان الوزارة ضحكت عالكل . وعايزة تقول انا لغيت منهج فبراير علشان مش كل المدارس خدت دروس مارس زي بعض

يا حلاوة .. ده على اعتبار اننا كمدرسين امتحنا الطالب في أول مارس أو حتى في منهج فبراير بس !! انا امتحنت الطلاب يوم الأربعاء الماضي 6 أبريل

الأغرب بقى ان فيه مدرسة مش عايزة تمتحن الطلاب الميد تيرم لحد دلوقتي

تخيل ان الطالب يدخل الامتحان العملي وامتحان الترم فاضله أسبوعين وهو لسه ممتحنش الميد تيرم

المدرسة بتعمل كده ليه ؟؟ علشان تنفذ تعليمات الوزارة ان الطالب ميغيبش . الطالب لو امتحن الميد تيرم مش هييجي المدرسة إلا على الامتحان العملي

طب كده يفضل الطالب محروق دمه يذاكر حاجات وهو عارف انها مش جاية أخر السنة !!!

استغربت جدًا لما قابلت طالب في المدرسة دي بيقول احنا امتحنا الأسبوع ده مواد الأنشطة التي لا تضاف والأسبوع الجاي هنمتحن يومين والأسبوع اللي بعده يومين

وطالب يا عيني فاكر ان كده لما هيمتحن الميد تيرم في 5 دروس كده مش هييجوا آخر السنة !! ميعرفش ان الملغي 2 بس

وممكن الملغي يكون مش ملغي أصلًا .. زي الرياضيات في الابتدائي .. المنهج بعد كده عايز الحاجات اللي اتحذفت .. يعني هضطر أراجعها برضه مع الطلاب

وكمان العلوم … ياعيني قال في سنة 4 ان الجهاز الهضمي مش جاي ومصادر الطاقة ….. وضحك عالناس وقال صفحة في درس مسارات الطاقة . أو بالأحرى نصف صفحة .. والناس فاكرة انه لغى الدرس كله …… وفي الاعدادي لما يلغي أول درسين من الصف الأول طب ما كده برضه الدرس الثالث كيمياء زيهم يعني عايزهم برضه تكافؤات ورموز وأنواع مركبات ومجموعات ذرية

وبالنسبة للدراسات .. هنجيب خرائط منين ؟؟