ملخص الأسبوع الأول للمدارس

الأزهر أجل أسبوع .. لا داعي لتأجيل المدارس

المدارس لم تكتمل صيانتها … لا داعي للتأجيل

الناس لسه مفاقتش من أجازة العيد .. لا داعي للتأجيل

عندنا ايه النهاردة .. 7 حصص ألعاب

حضرت في دفترك ولا لسه . أنا معرفش أصلا انا هشتغل صفوف ولا فصول ايه

نشرات ندب المعلمين والنقل جت ؟ .. ايه لسه ؟ طب هنعمل ايه ؟

جوابات بتوع ال30 الف جت واتوزعو عالمدارس ولا لسه ؟ ايه لسه مجتش يعني لما هييجو هنعدل الخطة تاني !!

يا أستاذ جايلنا ناس جديدة شباب من بتوع ال30 الف .. كويس . نمسكهم الشغل بقى ونريح الناس الكبيرة علشان يشربوا شاي ويمسكو الجودة ووحدة التدريب والتعلم النشط

هي الناس لسه مجتش . طب هطول في خطبة أول يوم كمان شوية لحد ما الناس تيجي

هو الناظر مش هيخلص الخطبة بقى احنا دماغنا وجعتنا من الشمس .. يخلص ايه . انت شايف حد غيره في المدرسة . لسه محدش جه

انت هتجيب كتب ايه بكره ؟ هجيب حسب الجدول ؟؟ هو فين الجدول ؟ طب هي فين أصلا الكتب اللي هنجيبها !!!!

هو احنا عندنا تاني امتى يا أستاذ . هات حاجتك كل يوم . الجدول بيتغير كل يوم

إيه ده .. متابع أول يوم . استر يارب .. سيبك يا عم ده جاي يمضي ويمشي

الوزير راح مدارس وملقاش طلاب .. أصلهم فرحان بيه وقالو لو قابلوه هيزعل وهما خايفين على زعله ومراحوش

هتعمل ايه في التعليم الفني ؟؟ هو احنا عندنا تعليم فني ؟ ماهم لغو الوزارة خلاص .. مش كده يبقى مبقاش عندنا !!!

جوزة مع الطلاب ؟ المهم يحضروا

الطلاب بيغنوا وولاد سليم اللبانين  … الطلاب بيحتفلو بالمدارس .. متقلش بختهم

مفيش مقاعد .. والمدرسين بيشرحو على حصيرة … عادي .. حنين إلى الطبيعة . الفصول جاهزة بس المدرسين والطلاب بيستعبطوا

مدارس آيلة للسقوط والشروخات رهيبة .. انت هتستعبط . هيئة الأبنية قالت انها ممكن تشتغل كمان 50 سنة وعايزة صيانة بسيطة

ناس بيعتدو على المدرسين وبينطو السور ويضربوهم  … طب ما المدرسين وحشين وبيدو دروس وقت المدرسة . وقت مدرسة مين يا حج . ده ضربوهم جوه المدرسة يعني اعتداء على موظف حكومي أثناء تأدية وظيفته .. خلاص متزعلش هننزل اعلان شجب وتنديد . وهنديها كمان شهادة تقدير !!

متابعات هنا وزيارات هنا . طب ما نعمل شوية جزاءات وقرارات نصيت نفسنا على الفضائيات وبتوع النت يشتغلوا

انا عايز ابني في الصف الأول … طب ما تجيبي ليه ديسك ولا نعمل الديسكات كلها فوق بعضها علشان كله عايز يبقى صف أول

ابني نظره ضعيف وكشفت عليه والدكتور قالي خليه يقعد في أول صف والسنة اللي فاتت المدرسين كانو بيشتكو انه مبيعرفش يكتب لأنه مش شايف السبورة .. ده على اعتبار ان كان بيدرسله ناس غيرنا واحنا منعرفش . وبعدين مين قال يقعد في الصف الأول … الدكتور ؟؟ وده بياخد كام في الحصة !! قصدي في الكشف

بلاعات مكشوفة …. وحمامات طافحة .. الوزير بيقول المدارس جاهزة . هتكذبو الوزير يعني ولا ايه ؟ كله زي الفل

عايزين كام كشكول .. عادي ولا سلك .. والجلاد لونه ايه . طب ما كله بيترمي .. يللا رزق ناس

فين الكتب .. لسه مجتش كلها . طب فرق اللي جه طيب . لسه مش عارفين المصاريف كام علشان ناخد منكم ونسلمكم

هو انتو بتاخدو مصاريف الكتب ليه ؟؟ علشان نعمل أنشطة في المدرسة … طب هي فين الأنشطة ؟

يا استاذ أحل السؤال الأول ازاي ؟ انت معاك الكتاب يابني ؟ لأ .. طب اسكت . اللي معاه هو اللي بيحل معايا واللي مش معاه بيبص وخلاص

طب ليه يا أستاذ المدارس التانية بتسلم الكتب وتلم الفلوس بعدين ؟ دول هبل يا حبيبي ؛ هو الطالب لو خد الكتاب هيدفع المصاريف ؟ ادفع علشان تستلم الكتب

يا أستاذ هو منهج السنة دي عن ايه أصلنا لسه مستلمناش الكتاب .. يا حبيبي السنة دي منهج جديد ولسه مشفتهوش .. يعني زيكم بالظبط !!

يا أستاذ هي التغذية جت ؟؟ هتفرق ايه ؟ انت هتاكلها ولا هتبيعها ؟ انت كده كده بتستلم التغذية بعد الفسحة علشان نلحق نلم حاجات الكانتين ونبيعهالكم … ولا انت عايز يجيلك تسمم بدري السنة دي

هناخد موضوع تعبير عن ايه يا أستاذ ؟ أكيد الاسبوع ده عن المدارس . والاسبوع الجاي عن انتصار اكتوبر . مش محتاجة فكاكة يعني .. اقعد !! يعني مش هنعمل عن عيد الأضحى .. يابني العيد خلص .. مش انا قلتلك اقعد .. يبقى اقعد !!

أقول تاني .. ولا كده كفاية