بقلم / أحمد حافظ
التفاصيل الكاملة للمشروع البحثي المطلوب في الصفوف الدراسية من 3 ابتدائي حتى 3 إعدادي:
– الطالب سيكون مطالب بإعداد مشروع بحثي واحد فقط (متعدد التخصصات) في كل سنة دراسية للانتقال إلى السنة التالية.. يعني مفيش بحث لكل مادة، هو بحث واحد لكل المواد.
– يستطيع الطالب أن يقوم بعمل المشروع بمفرده أو مع مجموعة من الطلبة (بحد أقصى 5 طلاب)، خلال الفترة من 9 أبريل حتى 15 مايو.. يعني الطالب من حقه يختار 5 من أصحابه أو جيرانه يعملوا البحث مع بعض، كل واحد يعمل حاجة ويجمعوا اللي عملوه ويسلموه بأسمائهم الخمسة.
– سيتم مراعاة اختيار الموضوعات بالنسبة لأعمار الطلبة من الصف الثالث الابتدائي حتى الثالث الإعدادي بما يتناسب مع أعمارهم.. يعني البحث المطلوب من طالب 3 ابتدائي هيكون مناسب لسنه وطريقة تفكيره، وطالب سنة رابعة كمثل، وهكذا.
– عناصر المشروع البحثي تتكون من: “العنوان، المقدمة، متن الموضوع، النتائج أو الملاحظات، المراجع”، وسيكتب الطالب الكود الخاص به على المشروع الذي سيقوم بعمله.. يعني الطالب يكتب في العنوان اسم مشروع البحث اللي اختاره وبعدين يكتب اللي شافه وفهمه من عملية البحث وبعدين يكتب ملاحظاته سواء كانت أرقام أو مشاهد وبعدين يكتب المراجع اللي قرأها، سواء كتاب المدرسة، أو أي كتاب تاني، هو حر.
– يوم الأحد الموافق 5 أبريل.. سيتم نشر فيديو توضيحي لطريقة عمل المشروع للطلبة على موقع الوزارة، وذلك كنموذج استرشادي لطريقة عمل المشروع البحثي بداية من اختيار الموضوع حتى يطمئن الطلاب.. يعني الفيديو ده هيكون فيه شرح تفصيلي إزاي الطالب يختار اسم البحث وإزاي يبدأ يكتبه وإزاي يسلمه وهكذا.
– الخميس 9 أبريل.. سيتم الإعلان عن جدول المشروعات البحثية لكل سنة دراسية على موقع الوزارة وسيتم نشره مطبوعا في الصحف القومية؛ وسيتكون الجدول من 4 إلى 5 موضوعات لكل سنة دراسية يختار الطالب أحدهما لتنفيذه سواء بمفرده أو مع مجموعة من الطلبة”.. يعني الطالب هيكون قدامك أربع أو خمس أبحاث، يختار منهم واحد فقط يكتب فيه، مش هيكون البحث المطلوب منه (واحد فقط إجباري) وكده قدامه فرصة يختار أي مشروع من اللي هتعرضهم الوزارة.
– إذا لم يتوافر الإنترنت لدى الطلاب بإمكانه الاعتماد على الكتاب المدرسي أو أي كتاب متوفر لديه في موضوع المشروع البحثي.. يعني مشروع البحث هيكون من الحاجات اللي درسها الطالب أو ليها علاقة بالمنهج اللي درسه في السنة الدراسية اللي هو فيها.
– متاح للطالب أن يقوم بكتابة المشروع البحثي على ورق وتسليمه إلى المدرسة وهي ستقوم بإرساله للوزارة عبر المنصة الإلكترونية.. يعني مش شرط الطالب يكتب البحث ويرفعه على المنصة الإلكترونية ومتاح له يكتب بالورقة والقلم ويروح يسلمه للمدرسة وملوش دعوة بالباقي.
– معلم الفصل دوره استرشادي ومساعد للطلبة في إعداد المشروعات البحثية، والوزارة هي من ستتولى أعمال مراجعة المشروعات البحثية للطلاب عن طريق تقييمها (مقبول – غير مقبول).. يعني المعلم بتاعك مش هو اللي هيصحح مشروع البحث علشان محدش يكون قلقان ويقول المدرس هيستقصدني أو غيره، المعلم دوره إنه يرشد الطالب يعمل إيه في مشروع البحث.. يكتبه ازاي يحله ازاي وهكذا.
– واحد هيقوللي إيه شكل مشروع البحث.. النهاردة وزير التعليم قدم مثال سهل وبسيط لكنه مش هيجي زيه للطلبة، مجرد مثال بسيط وهو: ممكن نسأل الطالب (مثلا) عن تعامل دولة مصر مع فيروس كورونا بالمقارنة مع 4 دول أخرى فلابد هنا أن يستعين الطالب في إجابته بإحصائيات وأرقام ونقارن بين القرارات الصادرة في كل دولة للتعامل مع كورونا.
مثال آخر: لو قمت برحلة إلى الفضاء، إيه نسب الغازات الموجودة في الغلاف الجوي وأثر غاز ثاني اكسيد الكربون على حياتنا.. مثال ثالث: تخيل إنك في رحلة نيلية من أسوان لدمياط إيه الأقاليم المناخية إللي عديت عليها في الرحلة دي.
أخيرا: مشروع البحث سهل وبسيط جدا، ياريت محدش يقلق، كفاية إن ابنك هيحل البحث مع أصحابه، أو هتشوف ابنك بيحل بطريقة جديدة وسهلة، مش هيكون قدامه ساعتين أو تلاتة يحل فيهم الامتحان، لأ ده قدامه أسابيع يحل براحته وهيجاوب بالطريقة أو بالإجابة اللي هو شايفها صح وهيقول رأيه كمان في عهد كأنه بيعمل رسالة ماجستير بس على صغير وانت كأب اللي هتكون مشرف على رسالة الماجستير مش دكتور الجامعة.. سيبوا ولادكم يتعلموا بالطريقة اللي العالم كله بيتعلم بيها، صدقوني الموضوع ممتع ومفيهوش تعقيد.. استثمروا في عقلية ولادكم.
-
-
-
-
-
-
-
-
-
