اللي عنده حد في ثانوية عامة يقرأ الكلام ده كويس:
نصائح مهمة عن امتحان العربي غدا:
🚩🚩🚩🚩📣🚩🚩🚩🚩
…………………………………..
✴️ في امتحان اللغة العربية وتحديدا سؤال التعبير، عايزك تاخد بالك من حاجة مهمة، إن سؤال التعبير هيكون مقسوم إلى جزئيتين، الأولى تعبير وظيفي والثانية تعبير إبداعي.. وسؤال التعبير الوظيفي هيكون إجباري وعليه 4 درجات.. أما سؤال التعبير الإبداعي عبارة عن موضوعين تختار منهم موضوع واحد وده عليه 10 درجات.
✴️اكتب موضوع التعبير الإبداعي في فقرات علشان تاخد العشر درجات كاملين والأفضل يكونوا ٦ فقرات.. هتقوللي يعني إيه فقرات.. هقولك يعني تكتب سطرين وتحط نقطة والسطرين دول هما “الفقرة الأولى” وبعدين تكتب سطرين أو تلاتة وتحط نقطة ودول هم الفقرة التانية وهكذا لحد ما تكتب كل السطور المطلوبة.
✴️ ياريت تخللي الفقرة الأولى عبارة عن مقدمة والتانية والتالتة والرابعة والخامسة هم الموضوع، والسادسة تكون الخاتمة.. وفكرة يعني حاجة جديدة تشرح فيها الموضوع اللي بتتكلم فيه يعني متكتبش الموضوع كله لوكشة واحدة كده.
✴️سؤال التعبير الوظيفي الأفضل يكون من ٨ إلى ١٠ سطور.
✴️ بلاش تكتب إجابتين للنحو والنصوص والبلاغة وتضيع وقتك في إجابتين وتقول هكتب إجابتين والمصحح هياخد الإجابة الصح.. مش هيحصل.. الليل هيحصل إنه هياخد الإجابة الأولى فقط ويصححها.
✴️ في نهاية كراسة الامتحان هتلاقي صفحات فارغة مفيهاش أسئلة، لو غلطت في أي سؤال وعايز تعيد حله صح وملقتش مكان تكتب فيه، اشطب على الإجابة الغلط بخط بسيط واكتب في إحدى الصفحات الفارغة: إعادة إجابة السؤال رقم كذا في صفحة كذا.
✴️ خليك مقتنع إن كل سؤال في الامتحان هيتخصص له معلم يصححه، يعني اللى بيصحح التعبير غير اللي بيصحح النحو غير اللي بيصحح النصوص وهكذا.. علشان متتعاملش بمبدأ “لما أحل النحو كله صح المصحح هيديني الدرجة النهائية في التعبير.. الكلام ده مش هيحصل”.
✴️ لازم تفهم كمان إن الامتحان اللي هيكون بتاعك هيكون مختلف عن الامتحان اللي مع زميلك اللى قدامك واللي وراك.. وكل لجنة هيكون فيها 4 نماذج امتحانات.. يعني السؤال العاشر عندك مش هيكون هو نفس السؤال اللي مع اللي جمبك لأ ده ممكن يكون السؤال رقم ٤٠.. بلاش تغش لأنك أكيد هتاخد إجابة غلط لأنها مش هتكون خاصة بالسؤال.. اعتمد على نفسك.
✴️الأسئلة الاختيارية موجودة لكنها هتكون بنسبة قليلة جدا (يعني لو فيه 11 جزئية هيقولك جاوب على 10 بس) والسؤال الاختياري مش هيكون منفصل لا ده هيكون جوه جزئيات سؤال معيّن علشان متكنش مضطر تقرأ أسئلة الامتحان كله علشان تختار.. مش معقولة هتقرأ 50 سؤال علشان تختار بينهم.. لأ هيجيلك السؤال العاشر مثلا فيه خمس نقط هتجاوب على 4 بس.. وهكذا.
✴️ لازم لازم لازم تحل الأسئلة المطلوبة منك الأول مش تحل كله (إجباري واختياري) لأنك ممكن تتفاجئ إن الوقت خلص وانت لِسَّه قدامك ١٠ أسئلة متحلوش لأنك بتحل الكل (اللي مطلوب منك تحله واللي مش مطلوب) لأ.. بنصحك لوجه الله تحل اللي مطلوب منك فقط الأول.
✴️ لو جايلك سؤال مثلا عبارة عن ٦ أجزاء وقالك اختار ٥، ممكن تحل الستة والمصحح هيختار لك الخمسة الأعلى في الدرجة، بس الأفضل تحل ٥ الأول علشان تضمن الوقت، ولما تخلص الامتحان خالص ارجع حل الأسئلة الباقية.
