طرح إتحاد أمهات مصر للنهوض بالتعليم، برئاسة عبير أحمد، سؤال علي أولياء الأمور من الأمهات حول هل يتم متابعة أبنائهم في المذاكرة والدراسة أم لا؟ وما هو السن والمرحلة العمرية التي تستحق المتابعة؟.
وتفاعل المئات من أولياء الأمور من الأمهات علي صفحة اتحاد أمهات مصر، في الفيس بوك، حيث قالت ولي أمر: “لغاية ما يخلص الإعدادية بعد كده اسيبه من أولى ثانوى يعتمد على نفسه وأتابعه فقط لو احتاجنى لازم أكون جنبه، المناهج بتتطور ولازم كلنا نساعد ولادنا مفيش أى حاجه لوحدها، الفكره مش أنى اسيبه الفكره أنى أكون مطمنه عليه ومتاكده أنه خلاص فاهم مصلحته وهيمشى أموره صح، المرحله دى وكل المراحل تحتاج متابعه ومراقبه وتواجد بإستمرار لغاية ما يعدوا بر الأمان”.
وأضافت ولي أمر: “طبعا بنتابع وهنستمر على المتابعه، مفيش سن بالنسبه لى هقف عنده لأنى شايفه إن عدم المتابعه هيسبب فى الإهمال”، وتابعت أخري: “حسب الطالب اللي قدامك، في حد بيحتاج تنقليه خطوة خطوة وفي حد تاني تأسيسه وتسيبيه وفي حد بيحتاج رؤوس أقلام مش أكثر”.
واستكملت أخري: “البنات واحده واحده بيحبوا يعتمدوا علي نفسهم مع متابعه بسيطه اسمعلها حاجه واقفه أمامها واشرحلها لكن الصبيان حنفضل متابعين لغاية مالا نهاية”، وذكرت ولي أمر: “المفروض إن من أولي ثانوي خلاص يعتمدوا علي نفسهم، بس المشكلة دلوقتي الدراسة الأون لاين محتاجة متابعة علشان ممكن الوقت كله يضيع مع السوشيال ميديا للأسف”.
“أنا بفضل أتابع لحد تالته إعدادى شرح ومذكرة، بذاكر معهم كلمه بكلمه، أما ثانوى متابعه من بعيد من غير ما أدخل فى منهاهجهم”، تضيف ولي أمر أخري: “بتختلف من أم لأم على حسب ظروفها لكن الإهتمام أكبر بيبقى للطفل الأول وبعد كده بيقل، لكن أنا شايفة إن مرحلة ابتدائى مهمة للتأسيس بعد كده متابعة بسيطة لأن الأم بيكون عليها عبء كبير”.
وأشارت ولي أمر أخري إلي: “أنا حاليا ابني في أولي إعدادى ومش عاوز يذاكر لوحده وحاولت كتير مفيش فايدة لو سبته لوحدة مايعملش حاجة خالص”، وقالت أخري: “لحد تالته إعدادي بتابع، أما من أول أولى ثانوي مع نفسه علشان يبدأ يعتمد ويشيل المسؤولية لكن بتابعه من بعيد”، وتابعت أخري: “أنا بذاكر معاهم بصراحة ومش بناخد دروس، أنا إللى قايمة بالدور كله لوحدى بالرغم من أنى إمرأة عاملة، ربنا يعينى ويعنكم جميعا”.
