التعليم العام

مؤسس “أمهات مصر” تطلق مبادرة للإهتمام بالكتابة بالخط العربي في المدارس

مؤسس “أمهات مصر” تدعو المدارس للتركيز علي الكتابة بالخط العربي لدي الطلاب

دعت عبير أحمد، مؤسس إتحاد أمهات مصر للنهوض بالتعليم، وائتلاف أولياء أمور المدارس الخاصة، المدارس بالتركيز والإهتمام علي الخط العربي وتشجيع الطلاب علي الكتابة بدلا من التركيز علي اللغات فقط، وإطلاق مبادرة بعنوان “الإهتمام بالخط العربي”.

وأضافت عبير، في تصريحات صحفية، أنه يجب علي معلم اللغة العربية التأكيد علي أهمية الخط العربي لدي الطلاب، والتميز والإبداع والفن الجمالي فيه، لافته أن غالبية الطلاب لا يجيدون الكتابة بالخط العربي بشكل لائق، مستطرده: “يجب علي المعلم تخصيص جزء من الخصة لتعليم وتدريب الطلاب علي الكتابة بالخط العربي بشكل جيد، مقترحه إقامة وتفعيل مسابقات بين الطلاب تتعلق بالخط العربي.

وطرحت مؤسس إتحاد أمهات مصر، علي صفحة الإتحاد في الفيسبوك، موضوع الخط العربي علي الأمهات من أولياء الأمور، حيث قالت ولي أمر: “بحاول معاهم والله وإن العربي دا أساسي ولازم يبقي خطهم حلو وعلي السطر وبشكل لائق، العربي مهم لأن دي لغتنا ولازم يبقوا عارفينها وعارفين أساسها وطريقه كتابتها لأن اللغه العربية فروعها كتير”.

وأضافت ولي أمر: “بصراحة وعلي الرغم من إن أولادي لغات لكن أنا بهتم جدا جدا جدا باللغة العربية ودي الأساس عندي ودايما بتابع موضوع الخط دا ضروري ويقومهم دايما وأصحح وأساعدهم بكيفية الكتابة الأدق وكمان لازم نحويا يكون النطق صح والحمد لله اتعودوا من صغرهم إن اللغة العربية خط أحمر بالنسبة لي وبالنسبة لهم وياريت كل الأمهات تركز علي دا”.

بينما ذكرت أخري: “بصراحة مش مركزين فيه وبنكتفى بمذاكرة الدروس والمرجعات فقط”، واتفقت معها ولي أمر أخري: “بصراحه الخط سىء جدا والله نقش فراخ، أنا حزينه جدا، الإهتمام بالانجليش بس”.

وأوضحت ولي أمر: “بنتي خطها جميل سواء عربي أو انجليزي، ابني هو ما شاء الله مستواه جميل بس خطه وحش جدا وبمسح أحيانا اللي كاتبه وبخليه يعيده تاني وده مخليني ماما شريره بالنسبه له”، وتابعت أخري: “بنهتم دي لغتنا ولغة القرآن الكريم، وبصراحة معلمه اللغة العربيه لأولادي بالمدرسه ربنا يبارك فيهم أكثر من رائعين”.

وقالت ولي أمر: “للأسف زمان كنا واحنا في ابتدائي المدرس كان بيهتم بالخط والكراسه لازم متسطره ومكتوب الواجب بطريقه حلوه، لكن دلوقتي العيال بتكتب وخلاص لا اتعودو علي تسطير ولا نظام ولا المدرس بيهتم بخطهم أصلا”.

ومن جانب أخر وجهت عبير أحمد، مؤسس إتحاد أمهات مصر للنهوض بالتعليم، وائتلاف أولياء أمور المدارس الخاصة، سؤال للنقاش بين الأمهات من أولياء الأمور، تضمن: “بتتعاملوا إزاي مع الولاد في المصروف وهل بيحتاجوا يشتروا من الكانتين ولا كل لوازمهم معاهم.. احكولنا علشان نفيد بعض؟”.

وتفاعل أولياء الأمور علي صفحة إتحاد أمهات مصر، في الفيسبوك، حيث قالت ولي أمر: “بتعمد أعطيهم مصروف علي الرغم إن الكانتين مغلق بسبب كورونا لكن بخليهم وأنا معاهم يدخلوا السوبر ماركت ويشتروا بفلوسهم علشان يعتمدوا علي نفسهم ويعرفوا مفهوم البيع والشراء خاصه أن الماث عندهم بتعلمهم نفس الفكره وبتعرفهم فئات الفلوس وإزاي يشتروا ويحسبوا”.

وأضافت ولي أمر: “بيكون معاه الأكل بتاعه وعصير ومياة وفاكهة وساعات حاجة حلوة بس بردو معاه مصروف ونادر أوى لو اشترى حاجة علشان الكانتين زحمة”، واستكملت أخري: “والله أنا بديها سويت وهي رايحه مع السندوتشات وبديها ٥ جنيه ساعات كتير بترجع بيها وساعات تصرفها”.

وذكرت ولي أمر: “أنا بديلهم بس مش كل يوم علشان يعتمدوا علي نفسهم في الشراء ويفهموا قيمه الفلوس ويعتمدوا علي نفسهم، والأيام التانيه بحطلهم كل احتياجاتهم عصير والإسناك بتاعهم”، وتابعت أخري: “أنا بعطيهم فلوس وهما بيشتروا من السوبر ماركت قبل مايروحوا المدرسة إللى هما عايزينو واحيانا بيحوشوا من المصروف أى حاجة حتي لو هيسيب جنية، والحضانة بجيبلوا إلى هو عايزة من بليل”.

“بعمل سندوتشاتهم وبخليهم يشتروا الحاجات قبل ميروحوا المدرسه بس بنتي قالتلي زمايلها بيشتروا من الكانتين قولتلها يوم واحد بس هديلك فلوس وانتي تشتري”، تضيف ولي أمر أخري: “بديله كل حاجه معاه وبديله المصروف عشان لو احتاج حاجه بس في الغالب بيرجع بيه”.

وقالت ولي أمر: “كل لوازمها معاها وبرضه بتصمم تآخد مصروف تشتري من الكانتين، واضح إن هرمون الشوبينج عند البنات من صغرهم”، وأضافت أخري: “أنا برضو بديهم السندويتشات واللبن ولازم مصروف ٥ جنيه ساعات يصرفهم وكتير بيحطها في حصالتهم”

وذكرت ولي أمر: “هما بيختاروا حاجاتهم بنفسهم كل يوم من السوبر ماركت، ولكن يوم الخميس كنوع من التغير بديهم فلوس ويشتروا واحنا مجموعة امهات تعرف بعض عاملين النظام دا كل خميس بس يشتروا ويحسوا بمسئوليه شرائهم للشئ”.

وأضافت أخري: “أنا هرد من وجهه نظري كأخصائي، هو مهم جدا هما يقرروا عايزين ايه وفي الغالب بيختاروا كانتين المدرسة اللي هو اغلى من بره وقتها تبدأ تقنعيهم إن لو اشتروا من السوبر ماركت الصبح هيجيبوا حجات أكتر، الجانب التاني مهم انهم ياخدوا فلوس في ايدهم مش حجات تتحط في شنطهم لأن امتلاك الفلوس من سمات الكبار وهما بيحبوا يحسوا الإحساس ده وكمان يتعودوا على التعامل المادي مع الأغراب وكمان بيقي الطفل من انه يمد ايده”.

“يا تري لسه الأمهات بتذاكر وبتراجع مع ولادها”.. أمهات مصر يجبن

وجهت عبير أحمد، مؤسس إتحاد أمهات مصر للنهوض بالتعليم، وائتلاف أولياء أمور المدارس الخاصة، سؤال إلي أولياء الأمور من الأمهات تضمن: “يا تري الأمهات لسه بتذاكر وبتراجع لولادها؟، كلمونا عن يومكم بيكون إزاي من أول خروجهم من المدرسة”.

وطالبت عبير، الأمهات بالتركيز مع أبنائهم خاصة بالمراحل الأولي، نظرا لحساسية وأهمية هذه المراحل في تأسيس الطفل والتلميذ، مؤكده أن المراحل الأولي هي التي يعتمد عليها الطفل عند التحاقه بباقي المراحل حتي الجامعة.

وتفاعل أولياء الأمور من الأمهات علي المنشور، علي صفحة إتحاد أمهات مصر في الفيسبوك، حيث قالت ولي أمر: “بنذاكر وبنراجع واللى بيقف معنا بنسمع فيديو عن شرحه ونرجع نشرحوا تانى معتمدين علينا إعتماد كبير”.

وأضافت ولي أمر: “اليوم بيعدي بسرعه جدا ومش بنلحق نذاكر كله بنحاول علي اد ما نقدر الأول نخلص واجبات المدرسة والمذاكره لأن الكويزات عندنا بدأت ربنا يعينا ويعين كل أم”.

وذكرت ولي أمر: “اليوم بيكون مشحون أول ما بيرجعوا ياخدوا شاور ويتغدوا وساعات يريحوا ساعه وساعات لا ونبتدي الكفاح ما بين هوم وورك وحفظ وحل شيتات ونراجع علي القديم وتحضير الجدول وبيكون اليوم خلص وإحنا خلصنا ونام علشان نصحي بدري تاني يوم”.

وتابعت أخري: “في راحة أولا بعد المدرسة وبعد كدا متابعة لما أخذ بالمدرسة ومذاكرة البيت وربنا معانا بجد”، واستكملت أخري: “اه طبعا، وفى مواد انا إللى بديهالهم مش بياخدو فيها دروس ويومنا زى أى يوم قبل كورونا”.

وقالت ولي أمر: “بنذاكر معاهم طبعا وطول اليوم مذاكرة واليوم كمان مش بيكفى، الله المستعان”، وأضافت ولي أمر أخري: “بنذاكر من بعد ما بيرجعوا من المدرسة وبنام ساعه ونصحى نتغدى ونكمل مراجعه واليوم بيجرى بسرعه جدا”.

وأوضحت ولي أمر: “بحاول قبل ماييجوا أكون مخلصه الأكل وشغل البيت وأول مابيوصلوا بالسلامه بيتغدوا وبعدين نعمل واجباتهم وربنا يعينا ويجعلها سنه سعيده يارب”.

البرنامج اليومي

ووجهت عبير أحمد، مؤسس إتحاد أمهات مصر للنهوض بالتعليم، وائتلاف أولياء أمور المدارس الخاصة، سؤال لأولياء الأمور حول البرنامج اليومي الذين وضعوه لأبنائهم خلال الدراسة، حتي يستفيد باقي أولياء الأمور.

وتفاعل العديد من الأمهات من أولياء الأمور علي صفحة إتحاد أمهات مصر، حيث قالت ولي أمر: “إن شاء الله نصحي ٧ نفطر ونلبس، ننزل للمدرسة ٨ إلا تلت، نرجع من المدرسة ٢ ونص نغير ونتغدي ونعمل الواجبات ونشوف بقي لو نذاكر شويه لغايه الساعة ٨ ونرتاح ويلعبو لغاية ٩ ندخل ننام”.

وأضافت ولي أمر أخري: “لما يرجعوا من المدرسة يرتاحوا ويتغدوا ويعملو واجباتهم وممكن بريك شويه ويرجعوا يكملوا وبعد كده يناموا الساعة 9 أو 10 بالكتير عشان يقدروا يركزوا”، وتابعت أخري: “ابنى الصبح يفطر ويروح المدرسة يرجع ينام ساعه ويقوم يذاكر”.

وذكرت ولي أمر: “بعد الرجوع يتغدى وينام ساعه وبعدين يصحى، طبق فاكهة صحى أو خضار، وبعدين يكتب واجباته ويريح ساعه، وبعدين نراجع معه اللى أخذه أول بأول عشان مينساش”.

بينما قالت ولي أمر: “أنا وضعي مختلف عن أي أم، أنا عندي طفلين سكريين محتاجه ترتيب خاص جدا، ونفس الوقت خايفه أنزلهم علشان كثافه العدد في الفصل كتيره، وبرضو مش هينفع يفضلوا في البيت، أنا في معاناة ربنا وحده يعلم بيها، عام سعيد للجميع بالتوفيق والنجاح يارب”.

دور المجتمع المدني

ومن جانب آخر قالت عبير أحمد، مؤسس إتحاد أمهات مصر للنهوض بالتعليم، وائتلاف أولياء أمور المدارس الخاصة، أن المجتمع المدني لابد أن يكون له دور كبير في دعم المدارس استعدادا للعام الدراسي الجديد.

وأضافت عبير، في تصريحات صحفية، أن الأحزاب السياسية يجب أن تدعم المدارس بالمنظفات والمطهرات وكافة الوسائل الوقاية كأحد الأدوار الهامة التي تقوم بها، لافته إلى الدور الكبير التي قامت به بعض الأحزاب خلال الموجه الاولي لجاءحة كورونا.

وأوضحت عبير أن الجمعيات الأهلية لها دور أيضا في دعم المدارس، من خلال توفير مطهرات ومنظفات وتقديمها للمدارس، مؤكده أن المجتمع المدني عليه دور كبير ومسؤولية وطنية، من خلال التنسيق مع المديريات والإدارات التعليمية والمدارس لدعمها.

عبدالله العزازي

مدير التحرير .. باحث بالدراسات العليا قسم التربية الخاصة

مقالات ذات صلة

تم إكتشاف مانع الإعلانات في متصفحك

برجاء تعطيل مانع الإعلانات لتصفح الموقع بشكل أفضل وكذلك دعم الموقع في الإستمرار، بعد التعطيل قم بعمل إعادة تحميل (Refresh) للصفحة