الوزارة تحرم طالب من امتحانات الثانوية العامة . والطالب : أنا مظلوم ….. ننشر الوقائع

 

كتب / عبدالله العزازي

 ننشر قضية الطالب عبدالله محمد محمد الشافعي .. والتي وصلتنا عبر رسائل الصفحة

كانت الوزارة قد أعلنت عن تمكن فريق مكافحة الغش الالكتروني من ضبط الطالب (ع.م) بلجنة عمر بن الخطاب الثانوية بنين بإدارة السادات التعليمية، والذي تمكن من تصوير ورقة الأسئلة لرفعها على مواقع التواصل الاجتماعي.

 

عبدالله محمد محمد الشافعي ..

طالب ثانوية عامة دفعة 2016 مدرسة الفاروق عمر الثانوية بنين – ادارة السادات – محافظة المنوفية ..

عبدالله كان رايح امتحان التفاضل و معاه موبايل .. بتاع الامن ع البوابة قاله ماينفعش تدخل بيه و كانت الساعة 9:00AM قاله طب خليه معاك قاله ماينفعش و قعد يقوله ارميه .. من هنا لهنا قاله خلاص الموبايل يتقفل و مايطلعش من جيبك و ماتفتحش .. عبدالله عمل كدا و دخل اللجنة و الموبايل ف جيبه و كانت الساعة حوالي 9:10AM ..

بعد ماخد الورقة و لسا بيبص ف الامتحان و هيبدأ كان عدى حوالي كمان 8\10 دقايق كدا ..

لقى الأمن و رئيس اللجان ومعاهم شرطة و معاهم رئيس اللجان و رئيس الدور و اتلموا كلهم و دخلوا عليه هو ع طول و قالوله طلع الموبايل اللي معاك .. كان قاعد ف أول ديسك ف وش المراقب و ف وش الناس اللي رايحة جاية ف الطرقة قدام الباب .. طلعه و كان مقفول خدوه منه و حرزوه ومسكوه بالعافية و كتبوا ورقة و بيقولوله امضي .. عبدالله بيقرأ قبل ما يمضي لقاهم بيلبسوه و بيشيلوه الليلة و اللي لحق يقراه “تم ضبط الطالب المدعو .. بمدرسة .. وقد تم ضبطه اثناء لجنة الامتحان و هو يحاول تصوير ورقة الامتحان و رفعها ع مواقع التواصل الاجتماعي …”

مع ان الموبايل كان ف جيبه و مقفول و هم اللي جم طلعو من جيبه .. المهم مارضاش يمضي و قالهم انا ماعملتش كدا و حاول يقطع الورقة العساكر مسكته بالعافية و الناس طلعت برة كتبوا ورقة تانية ..

دخلوا بالورقة قالوله لازم تمضي و هتمضي بالعافية يا اما هتشيل الليلة و ماعرفش ايه و الموبيل ههيتشال تحت ف الكنترول هنشوفه و لو مفيش حاجة هتاخد الموبايل ..

رئيس اللجان قاله امضي يا عبدالله ماتخفش مش هيحصلك حاجة و دة لمصلحتك و هتعدي عادي و مش هيحصل حاجة .. عبدلله قال لأ قالوله هتمضي ولا نلغيلك المادة ..

من هنا لهنا و عبدالله كان بيحسب هتعدي عادي زي ما صاحبنا ف نفس اللجنة اتمسك بموبايل و مضوه ع تعهد انه مش هيجيب موبايلات و مش هيعمل شغب و كدا ..

عبدالله نزل تحت للي قاله ادخل بالموبايل بيقوله ممكن تيجي تقولهم اللي حصل عشان حصلي مشكللة كبيرة؟ قاله لأ ماحصلش هو انا هروح ف داهية بسببك!!!

دخل جوة لرئيس اللجان بيقوله لو سمحت الموبايل قاله الموبايل اتحرز و هيتبعت مع ورقتك الوزارة قالهم ازاي و بدأ يعلي ف صوته نادوله الأمن و طلعوه برة المدرسة خالص ..

روح لقى اسمه نزل ع مواقع كتير و قنوات منهم موقع الوزارة و اليوم السابع و قناة النهار .. وبيقولوا اتمسك و هو بيصور الامتحانات و هو اللي كان بيصور كل الامتحانات اللي فاتت و سربها .. و هيتحبس و يتحرم من الامتحانات لمدة سنتين و يدفع 50,000جـ غرامة ..

الموضوع انتشر و فضل ساكت لحد ما راح الامتحان اللي بعده .. بيقولهم مكتوب كذا كذا ع المواقع و ماعرفش ايه .. قالوله لأ كله كلام بس و اطلع كمل امتحاناتك عادي .. قالهم طب و الموبايل قالوله تعالى الامتحان اللي جاي خده ..

فضل ساكت لحد الامتحان اللي بعده .. بيسأل ع الموبايل قالوله انت اللي صورت و انت اللي مسرب كل الامتحانات عايز اي حاجة روح الوزارة و موبايلك ف الوزارة .. ماخدش معاهم حق ولا باطل و الموضوع كبر ..

المهم امبارح وصل فاكس من الوزارة للإدارة السادات التابع لها مدرسته .. انه هيتم الغاء كل امتحاناته و حبسه مدة لا تقل عن 6 شهور و غرامة 50,000 .. و وصله الكلام دة من الإدارة ..

و هو مش عارف يتكلم مع مين ولا يشكي لمين ولا يوصل صوته ازاي ..