كتب / مغازي غنام
أنا اتصلت دلوقتي بمدير الفرع الرئيسي للأكاديمية المهنية للمعلمين بالقاهرة .
وسألته عن توضيح الخبر اللي نشرته الأكاديمية علي موقعها الرسمي بضرورة التسجيل للتدريب في الأكاديمية للحصول علي شهادة الصلاحية اللازمة للتثبيت والترقي لدرجة معلم .
**********************************
1 – قال احنا فعلا نشرنا خبر علي الموقع الرسمي ، وبعتنا فاكس لكل الفروع في مختلف المحافظات للبدء في تدريب كل المتعاقدين علي درجة معلم مساعد ، ومنهم ال 30 الف معلم مساعد .
2 – قولتله في ناس راحت سألت في الفرع قالوا التدريب ده للناس المتخلفين فقط عن التدريب اللي أخدناه قبل استلام العمل .
قال لأ طبعا ، قال التدريب ده مختلف عن التدريب اللي انتم أخدتوه قبل استلام العمل ، لأن التدريب اللي أخدتوه قبل كده كان تدريب استثنائي وكان خاص بال 30 الف معلم فقط ، وكان اسمه دورة تأهيل تربوي للمعلم المساعد لاستلام العمل ، وكان تدريب مجاني .
3 – أما التدريب ده تدريب للحصول علي شهادة التطبيقات التربوية ( شهادة الصلاحية ) اللازمة للترقي والتعيين علي درجة معلم ، والتسكين علي الكادر ، وده تدريب بمبلغ مالي وقدره 280 جنيه ، ولازم كل الناس تاخده عشان تترقي لمعلم .
4 – وقال تم فتح باب التقديم والتسجيل للحصول علي شهادة التطبيقات التربوية ، من تاريخ الإعلان وحتى يوم 8/9/2016 . أي قبل عيد اﻻضحى ، وذلك لعمل حصر لعدد المتقدمين في كل فرع من أجل تجهيز القاعات للبدء في التدريب في شهر 10 ان شاء الله ، وسيستمر التدريب طوال عام 2017 ، الي ان يتم الانتهاء من تدريبنا جميعا ، لأن عددنا كبير .
5 – بعد الانتهاء من التسجيل سيتم بدء التدريب ابتداءً من يوم 9/10/2016 .
6 – التدريب هيكون علي دفعات متتالية ، علي حسب الأعداد المتقدمة للتدريب ، وعلي حسب الظروف المتاحة والأماكن الخالية وعدد القاعات المتوفرة في كل فرع من أفرع الأكاديمية ، يعني في ناس هتبدأ تدريب في شهر 10 وفي ناس هتتدرب بعدهم …إلي أن يتم الانتهاء من تدريب كل المتقدمين قبل تاريخ التثبيت الخاص بنا وهو شهر سبتمبر 2017 .
7 – المطلوب حاليا ان كل ال 30 ألف ، عليهم التوجه لفرع الأكاديمية المهنية في المحافظة التي يعمل بها ، لتسجيل اسمه لكي يتم تدريبه بعد انتهاء فترة التسجيل .
8 – بعد التسجيل ستنتظر ميعاد التدريب ، وبعد التدريب هتاخد شهادة من الأكاديمية تفيد اجتياز دورة التطبيقات التربوية ، والاحتفاظ بهذه الشهادة لتقديمها مع باقي الأوراق المطلوبة للتثبيت ، مثل شهادة ال icdl وشهادة محو الامية .
9 – ميعاد وتاريخ التثبيت والترقي لدرجة معلم ، الخاص بال 30 الف هو 30/9/2017 .
10 – الأوراق المطلوبة للتقديم للتسجيل :
( صورة البطاقة – جواب من المدرسة التي تعمل بها أو افادة انك علي رأس العمل – صورة العقد – صورة صحيفة أحوال الكترونية معتمدة من الادارة )
11 – التسجيل والتدريب هيكون في محافظة التسكين ، وليس محافظة الاقامة .
لأن التدريب ده مختلف عن التدريب اللي اخدناه قبل استلام العمل ، و بيطلب منك صورة من العقد ، وصورة صحيفة أحوال الكترونية معتمدة من الإدارة ، وجواب من المدرسة اللي انت شغال فيها .
وبيشترطوا ان تكون بتعمل في نفس المحافظة اللي هتتدرب فيها .
زي ما محافظة كفرالشيخ عملت قبل كده واشترطت أن يكون المتقدم ممن يعمل داخل محافظة كفرالشيخ وليس خارجها .
12 – بالنسبة للناس اللي هترجع محافظتها ، تستني لما ترجع محافظتها الاول ، وتستلم في المحافظة الجديدة ، وبعد كده تبقي تروح تقدم في فرع محافظتها الجديدة ، لان لسه التسجيل مستمر حتي يوم 8/9/2016 ، وهتكون كل الناس اللي بتنقل خلصت نقل واستلمت في المحافظة الجديدة .
