أرسلت إلينا إحدى أولياء الأمور الشكوى التالية
يا سيادة وزير التعليم يا محافظ القاهره يا ادارة النزهه التعليميه .. يا سيادة الرئيس عبد الفتاح السيسى ..احنا الناس اللى بتدفع الافات وبتعلم ولادها على حسابها علشان توفر اماكن لغير المقتدرين في مدارس حكوميه احنا برضه اللى بندفع ضرايب عشان تبنوها ..لما تبقى هى دى معامله الناس اللى بتدفع في المدارس الخاصه اومال بيتعمل ايه في المدارس الحكوميه ..بلطجه ومدرسه قافله بابها وموقفه بادى جاردات امام اولياء الامور اللى اصلا رايحين يدفعوا فلوس علشان ولادهم مش رايحين ياخدوا ..لان المدرسه مصممه تاخد فلوس زياده عن كل طفل 1800 ج بدون وجه حق وبدون قرار من الوزاره وبدون حكم محكمه او قرار من الاداره التعليميه ..ومش بس كده اللى بيدفع باص بيضاعفوا عليه المبلغ ومش بيرضوا يدوله ايصال بالمبلغ اللى دفعه ..ولا حتى اثبات انه دفع من عدمه ..وموظفه من الاداره تطول لسانها ع وليه امر وتقولها انتى غبيه ..وموظف يسبلنا الدين ..ويقفلوا الباب ومايفتحوش غير لما جبنالهم الشرطه .. ويا ندفع الزياده عن السنه اللى فاتت بأثر رجعى وعن السنه دى كمان يا يمتنعوا عن استلام المصروفات .. وبدون وجه حق .. طلبنا قرار رسمى مختوم من الاداره واحنا ندفع الزياده ورفضوا .. هو كده لوى دراع ..فساد اداري ..و بلطجه.. الناس اللى خافت على ولادهم ودفعوا الزياده عن السنه اللى فاتت لانهم حجبوا النتايج عن اولياء الامور لحد مايتم الدفع عن السنه اللى فاتت بأثر رجعى واللى منهم انا للاسف راحت علينا الفلوس ورافضين يردوهم وهم عارفين ان مالهمش حق ..وكله في الاداره متظبط ومرتبات شهريه للموظفين عشان يطبخوها سوا
..في وليه امر قدامى النهارده رفضت تدفع الزياده وابنها عنده ملحق في 4 ابتدائي حجبوا عنها النتيجه وماعرفتش غير النهارده ..تخيلوا راحت تدخل ابنها السنه الجديده خامسه ابتدائي تفاجئ ان ابنها في 4 ابتدائي عشان كان عنده ملحق وماحدش بلغها لانها مادفعتش الزياده 1800 ج .. يعنى مش كفايه بدون وجه حق كمان سنه تضيع ع الطفل ..مش كفايه كتب مبالغ في اسعارها جدا عن بره ..كتب ب 300 ج نجيبها ب 1400 ج ليه ..حاربنا كتير جدا مع المدرسه وللاسف المدرسه مظبطه الاداره .. بيطلعوا اللى مش دافع بملاحق علشان يربوه بمعنى اصح لانه مادفعش ..وصاحب المدرسه مستخبي مش بيطلع يرد ع حد ومصدر البادى جاردات ..اولياء الامور اللى حابين يحولوا المدرسه رافضه تديهم ملفاتهم ولما قلنالهم ده قرار الوزير كان ردهم ..ده وزيركوا انتوا مش وزيرنا احنا
لحد امتى حنفضل نتهان بفلوسنا ..كفايه بقى ..من 7 الصبح ل 2 الضهر واقفين ع رجلينا في خناقات وشتايم وبلطجه وبيننا وبينهم باب حديد مقفول كأننا مجرمين وهم في تكييفاتهم وع مكاتبهم
كفاية بقى ..لازم يكون في حل انتوا سايبين الناس تخبط مع ادارة النزهه ليه ..مش بس اون هليوبوليس كل مدارس ادارة النزهه فيها بلاوى ..كفايه فساد بقى ..سيبنالكوا حقنا في التعليم المجانى وروحنا ندور ع تعليم خاص بحثا مننا عن مستوى افضل لاولادنا وهو ده المستوى يا ساده
وقالت أخرى
حضرت ولية امر بعد مكالمة من ابنها وهو فى المدرسة منهار ويبكى لانه دخل سنة رابعة ابتدائى المفروض انه ذهب للمدرسة على اساس رايح سنه خامسة ابتدائى
المدرسة حجبت النتيجة عن ولى الامر بسبب عدم دفع جزء من المصروفات ( أعادة التقييم ) ربنا لا يسامح كل من اصدر هذا القرار وعلى رأسهم الوزير الفاشل الكذاب محب الرافعى
والمفروض من ادارة المدرسة كانت تبلغ ولى الامر ان الولد عنده دور ثان فى الماث ولكنها لم تبلغه عن عمد من ادارة المدرسة وجبروت وبلطجة .
للصور والفيديوهات اضغط هنا
