التعليم تترك طالب ضحية لمافيا المدارس الدولية .. قضية تستحق المشاركة والمساعدة

أرسلت داليا النجار إحدى أولياء الأمور الشكوى التالية

فينك يا وزارة التربية والتعليم مفيش مسؤول فيكي يطلب مستندات ويقول اثبتي كلامك… دة ابني ابانوب رضا كمال اللي وزارة التربية والتعليم سايباة ضحية لمافيا المدارس الدولية… ابني ممنوع من دخول اي مدرسة على مستوى الجمهورية لأن مدرستة صاحبها رجل أعمال كبير ولة نفوزة مينفعش حد يقولة غلط فالاسهل يتساب طالب عمرة 14سنة في الشارع

الموضوع باختصار أن ابني فى المدرسة المصرية المتكاملة في العاشر من رمضان من تالتة ابتدائي من عام 2012 /2013 لما وصل خامسة ابتدائي عرضت علينا إدارة المدرسة انة يكمل باقي الترم الاول سادسة ابتدائي وقالت الولد سنة كبير وإمكانياتة تسمح والنظام الأمريكي يسمح ووافقنا وأخذوا مصروفات سنة خامسة وسنة ساتة وكمل الولد دراستة عادى وامتحن الترم الاول سادسة ونجح وامتحن الترم التاني.

واتحجبت نتيجتة الكلام دة سنة 2014/2015 وكان وقتها في حملة من الإعلامية مني العراقى على هذا النوع من التعليم وراحت تصور في هذة المدرسة فقام مدير المدرسة بالتعدي بالضرب عليها وعلى فريقها وعملتلهم محضر ووضعت من تاريخها المدرسة تحت الإشراف المالي والإداري للوزارة وقامت المدرسة مشكورة بإنكار وجود هذا الطالب عندها تماما من تالتة ابتدائي وقالوا دة كان فى مدرسة فى القاهرة الجديدة و جة محول منها ببيان نجاح مزور وتختفي كل ما يتعلق بة من شهادات حتى تصدق اللجنة اللي جايالهم الكلام وحولت ملف الولد للنيابة الإدارية

وبرغم ذهابنا إلى رئيس اللجنة اللي جاي أساسا مفوض من الوزارة لحل مشاكل الطلاب لأن المدرسة بها كم هائل من المخالفات وخليتة شاف بعينة اسم ابني مسجل في سجلات قيد المدرسة من سنة 2012 وشاطبين على اسمة بالقلم الأسود وكمان اسمة في سجلات قيد الوزارة بس بقى من غير شطب إلا انة أصر على كلام صاحب السمو (المدرسة) وصمم ينتظر انتهاء تحقيقات النيابة الإدارية رغم أن النيابة قالت انا مليش دعوة بالطالب تحدد مصيرة الوزارة انا بحقق مع موظفين

ورغم انتهاء تحقيقاتها بعد سنة ونصف وقامت بتحويل الموظفين المتلاعببن فى الادارة للمحكمة التأديبية وبرضو قالت يا وزارة حددي مصير الولد ودخلية فى الصف الدراسى الملائم لية بما يتناسب مع اقرانة إلا أن صاحب المدرسة ورئيس اللجنة رفضوا وقالوا وقضى ابني سنة دراسية كاملة في الشارع وبدأت سنة دراسية جديدة وهو بنفس الحال…

معي كل ما يثبت كلامى من مستندات تدين المدرسة والإدارة وتفضح تلاعبهم في ملفة ولكن للنفوز والمال سلطة أكثر بدل ما تروح المدرسة فى داهية من اللي عملتة بنتعامل انا وزوجي وابني على أننا مزورين وضللنا المدرسة والكل اغمض عينية عن اسم الولد اللي في سجلات قيد المدرسة والإدارة وبيعاقبنا احنا ومانعين الولد من دخول أولى اعدادى مع زمايلة ورافضين إعلان نتيجتة وباعتراف من رئيس اللجنة انة قام بحل مشاكل فى المدرسة أكبر من كدة لكن جة عند ابني ومعرفش يحل لأن اعطائة حقة هيثبت تلاعب المدرسة والإدارة باختام نسر على ورق مضروب يعنى سجن مش هزار فيضحوا بابني عادى مش مشكلة..

لكن لغاية آخر يوم من عمري هفضل احارب ولازم اجيبلة حقة ولازم يدخل أولى اعدادى بسنة الطبيعي مش هيدخل سنة دراسية أقل…

ارجوكم ساعدوني الرأي العام بيحرك الناس دى انا لوحدي ليا سنتين بيبيعوا وبشتروا فيا

https://m.youtube.com/watch?v=PZsaZ1bVLiU