أحمد حافظ
يا طلاب الثانوية العامة.. ضروري جدا قبل امتحان بكرة:
= بكرة العربي.. أول مادة في المواد الأساسية.. مهم جدا بالنسبة لإجابة الأسئلة المقالية.. لو محدد لك سطرين فقط تكتب فيهم متكتبش أكتر من سطرين.. محدد لك 3 سطور متكتبش أكتر من 3 سطور.. متقولش لما أكتب أكتر هاخد الدرجة كاملة.. ده مش هيحصل وبلاش تضيع وقتك وجهدك.
= عايزك تعرف حاجة مهمة جدا عن تصحيح الأسئلة المقالية وتحديدا في امتحان اللغة العربية.. وطريقة التصحيح دي هتطبق في باقي الأسئلة المقالية لكل الامتحانات.. الوزارة محددة لكل مصحح امتى يدي نص درجة وامتى يدي درجة وامتى درجة ونص وامتى درجتين لكل سؤال.. وكل خطوة بحساب.. ومتحدد للمصحح: لو الطالب كتب كذا ياخد درجة لو كتب كذا ياخد درجة ونص لو كتب كذا ياخد درجتين، لو الطالب عبّر بأسلوبه ياخد الدرجة وهكذا.. وهتلاقي في التعليقات على البوست طريقة التصحيح اللي هتطبق علشان متبقاش قلقان وتاخد درجة الأسئلة المقالية كاملة بإذن الله.
= علامات الترقيم عليها نص درجة وسلامة اللغة نص درجة والتعبيرات النحوية في طريقة الكتابة نص درجة وهكذا.. شوف الورق اللي في التعليقات ضروري.
= متقلقش من صعوبة الأسئلة لأنها (30% أسئلة بسيطة +40% أسئلة متوسطة المستوى +30% مستويات عليا) يعني الموضوع مش مستاهل منك قلق.. وعايز أقولك إن آخر ٣ سنين ما شاء الله امتحان العربي بيكون معقول جدا بشهادة أغلب الطلاب.. وتاني ضروري: شوف الصور اللي هحطهالك في التعليقات.
= لو اخدت نموذج رقم (أ) في أول يوم امتحانات أو تاني يوم امتحانات في المواد غير المضافة.. ده مش معناه إنك تاخد رقم النموذج في امتحان بكرة.. النموذج بيختلف من مادة للتانية لأن عدد الطلاب بيقل مع كل امتحان.. يعني مثلا الكل بيمتحن عربي.. لكن مش نفس العدد بيمتحن دين إسلامي.. فيه دين مسيحي.. مش نفس العدد واخد لغة تانية فرنساوي.. فيه ألماني وإيطالي وأسباني.. فرقم النموذج أكيد هيكون مختلف من مادة للتانية.
= متصدقش اللي يقولك: لو عملت إكس على دايرة في البابل شيت هتاخد صفر علشان الجهاز الإلكتروني هيفتكر إنك مختار إجابتين.. والله ده ما بيحصل ولا هيحصل.. والإجابات اللي زي دي بيكون ليها طبيعة خاصة في التصحيح.. وهحط لك في التعليقات صورة موثقة من الوزارة نفسها بالكلام ده.. يعني من حقك لما تظلل دايرة وتشوف إن إجابتك غلط، تعمل عليها إكس وتظلل دايرة تانية.. وهتاخد الدرجة.
= متصدقش اللي يقولك: لو ظللت رقم الجلوس غلط هتسقط في المادة.. متصدقش علشان ورقتك دي بتتراجع كذا مرة قبل ما تدخل على التصحيح.. وكل حاجة بتتراجع.. وأي بيانات مكتوبة في ورقة الأسئلة بتتراجع مع ورقة الإجابة بتاعتك.. متقلقش.. ومتصدقش غير كده.
= = متصدقش اللي يقولك لازم تجاوب في بوكليت الأسئلة.. بص انت حقك تجاوب في بوكليت الأسئلة بالرصاص وبعدين تروح تظلل الاجابات في البابل شيت بالقلم الجاف.. بس خوفي عليك إن الوقت يخلص قبل ما تلحق تظلل البابل شيت أو تنقل الإجابة من بوكليت الأسئلة للبابل شيت.. وكل ده يتوقف على حسابك للوقت صح.. وخد بالك.. الوزارة مش هتبص نهائيا لإجابتك في ورقة الأسئلة.. نصيحتي بس خد بالك من الوقت وسيب وقت لنقل الإجابات من بوكليت الأسئلة للبابل شيت.
= دي أهم النقاط اللي لازم تعرفها قبل امتحان العربي.. ربنا معاكم ويجبر خاطركم وتكون اللغة العربية بشرة خير عليكم.. من فضلك لو تعرف حد في ثانوية عامة ابعت له المعلومات دي 🙏
